Velma: Un fim con Gianmarco Tognazzi in maranese

de Bruno Rossetto Doria


Velma



L’ano passò i gera vignùi a domandame se podevo traduse in maranese el mediometragio "Velma". El gera stò pensò e scrito dal regista Piero Tomaselli, un zovene de Servignan che ’l se ga formò a Roma, drento la Nuct de Cinecità.
Tomaselli el veva de svilupalo in forma senegiata e co i xe vignùi a sercame, sol el pensier de fa cognosse mèjo el nostro paese e la nostra parlada fora de Maran, ghe vevo dito indruman de sì.
Piero el veva insielto Maran, parché el se gera inamorò del nostro palùo, de le isole Sant’Andrea e Marineta, de l’oasi, de i casuni, par no parlà del paese e de la zente maranese. ’Mo tacò lavorà e semo ’ndài vanti un bel tòco posta giustà i discursi in maranese. Anca co i aturi Giorgio Monte, Emanuele Buttus, Gianmarco Tognazzi e quìi altri ciamài a fa qualchi tòco, ’mo lavorò par mete insieme le batùe, insielze quele che suneva mèjo in maranese.
Mancheva sol de tacà a girà el mediometragio. Gera de vènere, gerévomo drio tornà de la Marineta e in scafo se veva deciso de scuminsià luni, parché doménega sarissi rivada la cinepresa de Bologna. Piero ghe gera rivada na telefonada e el gera deventò de colpo bianco: la lo viseva che la Region e la banca i veva tajò el contributo e i veva dito che se ne riparleva forsi l’ano dopo. A bordo gera come che i ne vissi sparò, che i vissi copò qualchidun. Vévomo studiò i giughi par zurni, metùo posto el casòn, speso fadighe e movùo zente par gnente. Na telefonada la xe bastada par mandà a l’aria duto. Co Maran se ’mo lassài, avilìi, credévomo che romai "Velma" la sarissi stada na roba insumiada. Co in magio de sto ano Piero Tomaselli el me ga telefonò de tignì pronto el scafo, parché in setenbre vévomo de scuminsià girà el cine, no me pareva gnanca vero, saltevo de contentessa par elo e anca par quìi zùvini de la trup, che romài i gera deventài come de fameja.
"Velma" xe na storia ’sai triste tocada al Capitano (inpersonò da Giorgio Monte), un pescaòr maranese che, persa la fia e la mujer t’un bruto incidente el gera ’ndò fora de testa. Persi i semenài, veva tacò daghe fastidio duto e duti, e cussì el gera ’ndò vive sol a casòn. Là podeva ’ndà trovalo sol Manuel un zovene maranese un giosso stranbo, che ‘l ’ndèva cioghe el pesse e vèndeghelo par cronpaghe de magnà e le sigarete.

La storia la conta che el Capitano quela note no ’l gera stò bon de serà ocio colpa del mar grosso, del pensier che ’l veva calò la rete massa rente la spiaza. La matina dopo el sintiva ancora le onde che le sbateva e cussì, montò in batela, invissi de ’ndà fora in mar vogando, la veva ligada sul pontil a bonassa de la marineta. Capitano el gera ’ndò a pìe par vede ’ndove che gera ’ndada sbate la rete, ma somejèva come che ’l savissi là che la gera, dato che ’pena fora i sterpi el gera ’ndò sbate col naso parsora el maso de lore. Strassinàe in spiaza con le onde, le passelere le gera dute piene de gransèle e de gramài. Avilìo con la testa sbassada el Capitano el veva tacò a fa una in massada e, metùa in banda dopo finìa, prima de ciò sù un’altra, alsada la testa el vidi i cocài che un giosso più in là, i gera drio magnà e barufà tra de luri. El credeva che i fussi drio magnà un pesse de quìi grandi ma ghe gera vignùi i sgrìssuli ’pena visto smove un brasseto che ‘l sercheva de parà via i cocài. El gera ’ndò de corsa a fali scanpà, butasse in sdinociòn pa paràla de luri. El brasseto el gera de na fiola che la rispireva ancora. La veva qualchi becòn su i brassi, ma la gera ancora viva.
La se lamentèva ma no la gera bona de parlà gnanca na parola. Distrigada de la rete, ciolta in brasso la cicia, el gera drio portala in batela co el veva sintùo el motoscafo. Sensa gnanca savè el parché el se gera metùo a core drio i sterpi inserca de scondesse. Gera i carbinieri de Lignan, che forsi i ’ndeva vede de la fiola. No lo ga visto nissun e, na volta menada a casòn con la batela, el decidi de tignila posta che la ghe fassa conpagnìa. Trovada oro la velma in spaza, parché no la parleva, che no ’l saveva come ciamala, el ghe veva dò nome "Velma".
I primi zurni, el gera duto rabioso con ela parché no la parleva, che cussì no la ghe feva conpagnìa. El Capitano el ghe salteva sù, la ruspèva de cativo anca se no la feva gnente. Po’, pian pianin, tra elo e la fiola gera nato e cressùo un grando afeto, tanto grando che, in ultima, co al Capitano ghe ciapa el mal de ’ndà oltra, dopo che lo veva jutò a strassinasse sul giogo che ’l ndeva senpre a pregà in scondòn, Velma no la xe bona de lassalo sòl, la speta insieme che crissi l’aqua e la decidi de ’ndà de oltra con elo.